Sunday, July 20, 2014

പനി പിടിച്ച കുന്ന്

പുഴ വറ്റിയതറിഞ്ഞ്
ഒരു പകൽ നിർത്താതെ
കരയുന്നുണ്ട് .
കുട നീർത്താതെ നിന്ന്
മഴകൊണ്ട കുന്ന്
പനിച്ചു വിറച്ചു .
തുമ്മലും ചീറ്റലും മാറാതെ
സഹികെട്ട കുന്ന്
വടി കുത്തിപ്പിടിച്ചിറങ്ങാൻ
തുടങ്ങി .
റോഡിലേക്കിറങ്ങി
വാതിലുകൾ മുട്ടി
മുറികൾ തോറും
 കയറിയിറങ്ങി
കമ്പിളിപ്പുതപ്പിന്റെ
ചൂടുപറ്റി
അടുപ്പുകല്ലിൽ പിടിച്ചുകേറി
കഞ്ഞിക്കലം കഴുകി കമഴ്ത്തി
വയലുകൾ കടന്ന്
വരമ്പുകളുടച്ച് 
വഴികളിലെല്ലാം
ചുമച്ചുതുപ്പി
അവസാനം
പെട്ടിക്കടയിൽ തൂങ്ങിക്കിടന്ന
പത്രക്കടലാസിൽ
ചുരുണ്ടുകൂടി .

 

No comments:

Post a Comment